سنه اولى ادارة

كلنا مر بهذه التجربة: انت محترف مبدع في عملك (سواء كنت مهندساً او طبيباً او مبرمج او مصمم مواقع...الخ), ونتيجة لذلك يتم ترقيتك لتصبح مديراً للقسم (او قائداً لفريق عمل)، تفرح بالترقية وبالتقدير وبالمنصب الجديد (وكمان بالزيادة في المرتب) وبعد عدة ايام تكتشف الحقيقة المرة، فبدلاً من عملك المبدع الذي اعتدت ان تستمتع به كل يوم اصبحت الآن شخص مطلوب منه كتابة تقارير رتيبة وتوقيع نماذج روتينية وحضور اجتماعات شديدة الملل والخناق مع زملائه (الذين كانو اصدقائه حتى وقت قريب).. تتصدم الصدمة الأولى.. تفكر ماذا تفعل, هل تطلب من الإدارة اعادتك الى منصبك الأول وساعتها هاتخسر الترقية والمنصب وزيادة المرتب وثقة الإدارة فيك هاتتهز.. وياريت على كده وبس.. دول ممكن يجيبو زميلك اللي مش فاهم حاجه ومابيشتغلش نص شغلك يبقى مدير عليك،  تقرر ان يبقى الوضع على ماهو عليه واهي كلها ايام وبنقضيها.

بعد عدة ايام كمان, تكتشف البعد الحقيقي للوظيفة، الموضوع مش ترقية وزيادة وتقارير واجتماعات وايام بتعدي وخلاص.. لا.. دي طلعت مسئولية كبيرة, ومشاكل كتيره. انت قبل كده كنت بتخلص الشغل اللي مطلوب منك على اكمل وجه وتروح بيتك مبسوط ومستريح. دلوقت انت مش هاتستريح الا لو كل الفريق بتاعك خلص شغله على اكمل وجه وفي الميعاد والمشكله ان مش كل اعضاء الفريق بنفس التفاني والحرص بتاع سعادتك، ده فيهم اللي عايز يعمل اي حاجه وخلاص علشان يروح وفيهم اللي مش عايز يعمل حاجه اصلاً وفيهم اللي عايز يعمل حاجه كويسه بس مش عارف ازاي؟ والمفروض ان سعادتك تتغلب على كل العقبات دي.. تتصدم الصدمة الثانية.

دلوقت ماعادش قدامك غير انك تختار حاجه من اتنين، يا اما تدور على وظيفتك القديمه بس في شركة تانيه (مانت ماينفعش تتراجع في الشركه دي زي ما اتفقنا) او انك تعلم نفسك ازاي تتغلب على هذه العقبات وتصبح مدير ناجح وبدل ما تستمتع بنجاحك الفردي، تستمتع بنجاح كل الفريق.

بالنسبه لى انا اخترت الطريق الثاني ولسه باتعلم كل يوم حاجات جديدة، شويه من الكتب وشويه من الدورات وشويه من الإنترنت وكتير قوي من اخطائي. هاحاول ان شاء الله اني اشارك اللي اتعلمته معاكم في هذه المدونة. وكبداية احب ان انقل مجموعة من اهم النصائح التي وضعتني على الطريق الصحيح والتي ستجدونها في البوست التالي.