بسم الله الرحمن الرحيم
من زمان وانا نفسي ابقى مدون .. مش علشان الشهره والمجد (هم فين دول .. ده حتى معظم المدونين مش لاقيين ياكلو ) .. لكن بصراحه لاني باحترم كل انسان بيستقطع من وقته ومجهوده علشان يكتب معلومه جديده ممكن تفيد انسان بيدور عليها.
انا واحد من الناس اللي استفادت كتير قوي من الإنترنت، مش بس ثقافياً لكن على المستوى المهني والمادي باعتبار ان مجال عملي هو تطوير مواقع وبرمجيات الإنترنت. وبالرغم من اني كنت بابقى سعيد جداً كل مابحث في مجال معين والاقي المعلومه اللي توفرلي وقت ومجهود او تكون سبب في نجاح مشروع من مشاريعي لكن في نفس الوقت كنت باستصغر نفسي لاني كنت باخد بس ومابعطيش.
قررت من سنه اني ابدأ بالتدوين .. لكن برضه فكرت في نفسي.. لازم اعمل مدونه تبين قد ايه انا محترف !! لازم يكون تصميمها يجنن وفيها حاجات (Features) مش موجوده في المدونات بتاعة الناس ال”عاديين”, وطبعاً علشان اعمل كده لازم يكون عندي وقت, ولأني انسان باشتغل على الأقل 10 ساعات في اليوم وعندي اسره وباحب القراءه وباتفرج على الأفلام “اللي تستاهل” وبالعب جيمز “اللي تستاهل برضه” فماكانش فيه وقت!!!
النهارده بس فقت واكتشفت اني باهرج وان لو كانت نيتي صافيه علشان افيد الناس كان ربنا يسرلي وطلعت بمدونتي من زمان.. وبما ان النهارده هو آخر يوم في شعبان وبكره اول رمضان .. قررت اني لازم ابدأ .. نزلت الوورد بريس على الهوستنج بتاعي وبدأت بالقالب التقليدي .. مش مهم شكلي يكون محترف او مبتديء .. المهم اني اكتب اي حاجه يستفيد بيها اي انسان .. يمكن ربنا يكتبها في ميزان اعمالي الصالحة واكون من عتقاء رمضان (يا رب)
وكل سنه وانتو طيبين
المشاركات
هناك ٥ تعليقات:
أخى الحبيب
ألف مبروك على المدونه الخاصه .. الخاصه جداا .. ( مش زينا مجانى يعنى :) )
والله انا كمان كان نفسى من زمان اشوف مدونتك .. كان نفسى أقرا لقدوتى ولأمثلى الاعلى ..
ولأنى ولله الحمد واثقه من قدراتك الكتابيه والتقنيه .. واثقه ان المدونه دى هتكون مختلفه كليا وجزئيا إن شاء الله ..
بتمنى لك الخير دائما يا اخويا الغالى .. ويا مثلى الأعلى دايما ..
بس برضه هنستنى التصميم اللى يجنن .. و (Features) المختلفه عننا ياسيدى :)
اخيراً...........
في البداية احب اشكرك لاننا حنسنزيد من بحر من المعلومات والآراء الجميلة والمفيدة
ومتنساش تحكلنا عن تجاربك في الموبيلات الي استخدمتها و وتجربتك في الالعاب زي ال WII و DS وWOW والتكنولوجيات الجديدة في كل المجالات
انت عندك الكتير والكتير يا منصور واحنا بنحب نسمعلك وفعلن بنستفيد منك ويارات كل الناس تستفيد
ربنا يوفقك والي الامام وانا متابع
اختي الغاليه, ضي القمر
ايه الكلام الجميل ده بس .. اخجلتي تواضعي
. انا بدأت المدونه بحماس وكان نفسي كل يوم احط حاجه جديده بس مع الأسف رجعت الإنشغالات بقه. بس بعد التشجيع ده ان شاء الله هاكمل. وربنا يجعل في اللي هاكتبه فايده ليا وليكو.
اخي الحبيب تامر،
اشكرك على التعليق الجميل والمشجع جداً. واعتقد ان الرد يالشكر مش هايكون كفايه. لازم اكتب اي حاجه جديده النهارده علشان استحق ثقتك الغاليه.
صباحو أبيض يا حاج منصور كان نفسي أشوفك بس معلش
كل سنه وانت طيب
إرسال تعليق